АДИЛЕТ КЕРИМБЕКОВ: «Жаштар макалдарды унутпасын деген максатыбыз бар»

Мекенин ойлогон мекенчил жаштар жалпы эл сыймыктана турган жакшы саамалыктарды кылып келишет. Жакында алардын катарын кыргыздын макалдары жазылган кийимдер толуктады. Бул оригиналдуу идеянын ээси өзү жана иши менен тааныштырат.

– Адилет, кийимдерди кыргыздын макалдары менен чыгаруу идеясы кандайча пайда болду?

– Мурда Европанын ар кандай жазуулары бар кийимдерин сатып кийчүмүн. Англис тилин азыр үйрөнүп атам, мурда билчү эмесмин. Анан кийимимдеги жазууларды англис тилин билген досторум окуп «бул жерде уят сөз жазылып турат» деген учурлар болду. Ошондо намыстанып эмнеге кыргызча жазуулары бар кийимдерди чыгарсак болбойт деген ой келди. Жарым жыл даярданып алып ишке кириштик. Бирок дароо эле макалдарды жазабыз деген ой болгон эмес. Алгач анализ жүргүзүп, анан макалдарды жазып чыгарууга токтолдук. Тактап айтканда, Инстаграм социалдык тармагынан баракча ачып, ага футболкага ар кандай сүрөттөрдү, жазууларды, макал түшүрүп киргизип бир жумадай элдин таразасына койдук. Бул аралыкта окурмандардын көпчүлүгү макал түшүрүлгөн футболканы өзгөчө жактырышты. Ал турсун, «кайдан алсак болот?» деген суроолор да болду. Ошентип, макал менен чыгарууга токтолуп, уникалдуу футболкаларды чыгара баштадык. Уникалдуу дегеним, биздин жазуулар фотошоп аркылуу чапталган эмес. Биринчи этабы каллиграфия болуп кол менен кагазга 2-3 варианты түшүрүлөт, мен арасынан мыктысын тандайм. Ал компьютерге киргизилип леттеринг ыкмасы менен жасалат. Бүгүнкү күндө футболка менен кофта чыгарып жатабыз.

– Кийимдерди да өзүңөр тигесиңерби?

– Албетте, биздин «Саркеч» брендинин максаты - Кыргызстандын атын чыгаруу. Биздин өлкөдө деле мыктылар бар, импорттон бир аз алысыраак болууга үндөйбүз. Азыр «Саркеч» брендинин үстүндө 15тей адам эмгектенет. Баарына акча төлөнөт, салыкка кетет. Өзүбүздүн кийимдерибизди өзүбүз сатып алсак, мекенибизге эле пайда келтиребиз да. Башка өлкөнүн кийимдерин сатып алсак, акча ошол өлкөгө кетет. Кыргызстандыкы десе баары эле «сапаты анча эмес» дей беришет, биз сапаттуу тиккенге көңүл буруп, болушунча аракет кылып атабыз.

– Кандай макалдарды колдонуп атасыңар?

– Алгач жаштарга бир аз тамаша аралаш кылалы деп «Алма быш, оозума түш» менен олуттуу катары «Сабырдын түбү сары алтын» деген макалдарды чыгарганбыз. Эки макал менен базарга чыксак, «Сабырдын түбү сары алтын» макалы жазылган кийимдер абдан жакшы өттү. Алма быш, оозума түш» деген макалды жалкоого, бекерчилерге таандык деп көп сурашкан жок. Андан кийин «Жигитке жетимиш өнөр аздык кылат», «Кыздын кырк чачы улуу», «Ийгиликтин эрте-кечи жок» деген макалдарды колдонуп атабыз. Андан сырткары «Апама сүйүүм чексиз», жаш балдарга «Атасынын баласы» деген сыяктуу жазуулар менен кофталар да бар. Макалдарды жазуу менен жаштар макалдарды унутпасын деген максатыбыз бар. Негизи кыргызда макал көп, биз позитивдик маанайдагыларын гана тандап колдонобуз. Жакында жаз, жай кийимдери чыгат, буйруса, дагы жаңы макалдар кошулат. Балдарга арналган кийимдер менен кыздардын туникаларын, өзгөчө стилдеги көйнөктөрдү да чыгаралы деп атабыз.

– Эмгегиңерге карата кандай пикирлерди угуп атасыңар?

– Элибиз орусча, англисче жазуулары бар кийимдерди кийип көнүп калыптыр. Кыргызча жазууну көрүп «биздикилер да ушинтип чыгарабы?» деп таң калышууда. Кардарлар “жакшы саамалык баштаптырсыңар, дагы жаңылыктарды ойлоп таба бергиле, күтөбүз” деп жылуу пикирлерин билдирип жатышат.

– Силердин кийимдериңерди кайдан сатып алсак болот?

– Буга чейин Инстаграмдагы @sarkeсh баракчабыз аркылуу эле жарнама кылып, сатып келген болсок, азыр соода борборлорунун биринде бутик ачып атабыз. Буйруса, эл өзүбүздүн бутигибизге келип кийим алчу күн алыс эмес. Ага чейин Инстаграм баракчасы бизди кардарлар менен байланыштырып турат.

 

 

Динара ЧОКОЕВА